[prenta uppsett í dálka] 80. fundur, 122. lþ.
Frsm. allshn. (Sólveig Pétursdóttir):
Hæstv. forseti. Ég mæli fyrir nefndaráliti og brtt. allshn. á þskj. 865 og 866 um frv. til vopnalaga.
Nefndin hefur fjallað um málið og fengið á fund sinn fulltrúa frá dómsmrn. og embætti ríkislögreglustjóra. Þá bárust nefndinni umsagnir um málið frá fjölmörgum aðilum.
Í frv. er að finna heildstæðar reglur um vopn. Við samningu þess var að miklu leyti byggt á núgildandi löggjöf um skotvopn, sprengiefni og skotelda en nú er lagt til að settar verði víðtækar reglur sem nái til allra tækja sem telja má til vopna.
Meðal helstu nýmæla frv. má nefna að þar er hugtakið vopn skilgreint og er skilgreiningin nokkuð víðtæk. Þá er að finna í frv. reglur um iðkun skotfimi en ekki hafa verið ákvæði í lögum um þá íþrótt. Einnig er að finna í frv. ákvæði um söfnun og sýningar vopna, ákvæði um hnífa og önnur árásarvopn, auk þess sem kveðið er á um sérstaka samræmda landsskrá yfir skotvopn. Þá er lagt til að heimilaður verði rekstur skotvopnaleiga og að sú meginregla verði lögfest að ekki skuli veitt leyfi fyrir öðrum skotvopnum en þeim sem eru lögleg samkvæmt veiðilöggjöfinni. Þá er frv. ætlað að tryggja öruggari meðferð skotelda þar sem lagt er til að lögfest verði ákvæði sem hingað til hafa verið í reglugerð, m.a. um lágmarksaldur þeirra sem selja má skotelda. Einnig eru í frv. fyllri ákvæði um upptöku vopna en nokkuð hefur skort á slíka heimild varðandi hnífa. Loks er lagt til að ríkislögreglustjóri taki við þeim stjórnsýsluverkefnum sem ráðherra fer með samkvæmt gildandi lögum.
Nefndin leggur til nokkrar breytingar á frv. og má segja að ábendingar um flest þau atriði sem lagðar eru til breytingar á hafi komi frá embætti ríkislögreglustjóra. Helstu atriði breytinganna eru í fyrsta lagi að lagt er til að táragasi verði bætt inn í upptalningu í e-lið 1. mgr. 2. gr. til áréttingar því að lögunum er ætlað að taka til gasvopna og táragasvopna. Sams konar breyting er lögð til við 30. gr.
Þá er lögð til breyting á 1. mgr. 3. gr. frv. þess efnis að til lögreglu teljist opinberir, erlendir öryggisverðir sem fá leyfi til að flytja inn og bera skotvopn undir stjórn lögreglunnar. Þannig er lagt til að slíkir öryggisverðir falli undir undanþáguákvæði 3. gr. og því gildi lögin ekki um vopn, tæki og efni í þeirra eigu en gert er ráð fyrir að ráðherra setji sérstakar reglur um slík vopn. Barst nefndinni ábending frá ríkislögreglustjóra um að nauðsyn væri að hafa slíka heimild í lögum.
Við 5. gr. eru lagðar til tvær breytingar. Annars vegar er lögð til breyting á 6. mgr. þar sem kveðið er á um bann við því að flytja inn, framleiða eða eiga sérstaklega hættulegar tegundir vopna sem eru eingöngu ætluð til nota í hernaði. Lagt er til að ákvæðið taki ekki aðeins til vopna heldur einnig til einstakra hluta vopnanna. Hins vegar er lagt til að reglugerðarheimild 8. mgr. nái einnig til þess að settar verði reglur um prófun, merkingar og gæðaeftirlit efna og tækja sem heimilað verður að flytja til landsins.
Þá eru lagðar til tvær breytingar á 13. gr. frv. Annars vegar er breyting þess efnis að lögreglustjóri geti veitt manni búsettum erlendis tímabundið leyfi fyrir skotvopni enda uppfylli hann skilyrði laganna fyrir veitingu skotvopnaleyfis. Með hinni breytingunni er lagt til að bætt verði við 3. mgr. ákvæði þess efnis að ráðherra setji í reglugerð auk ákvæða um námskeið, ákvæði um próf í meðferð og notkun skotvopna, áður en skotvopnaleyfi er veitt. Þykir rétt að reglur verði settar um að tilteknum árangri skuli náð áður en slíkt leyfi er veitt.
Við 16. gr. er lagt til að bætt verði við undanþáguheimild ákvæðisins reglu þess efnis að ef vikið er frá meginreglunni um að sá sem erfir skotvopn skuli hafa skotvopnaleyfi, skuli vopnið gert óvirkt. Er ætlunin að tryggja þannig að erfingjar geti haldið eftir vopnum sem hafa minja- eða tilfinningagildi, án þess að vera með vopnaleyfi og án þess að stofna öryggi borgaranna í hættu.
Þá er lögð til orðalagsbreyting á 20. gr. og á 21. gr. er lögð til breyting þar sem hnykkt er á því hvernig fara skuli með vopn sem flutt eru milli staða. Þannig er lagt til að mælt verði fyrir um að við burð og flutning á skotvopnum milli staða skuli þau vera óhlaðin og í umbúðum. Einnig er lagt til að ákvæði verði bætt við frv. þess efnis að við umræddar aðstæður sé óheimilt að bera vopn á sér innan klæða.
Lagt er til að bætt verði við ákvæði 4. mgr. 34. gr. um haldlagningu, heimild til að leggja hald á öll þau vopn sem lögin taka til en ekki eingöngu ákveðin vopn sem talin eru upp í frumvarpstextanum.
Einnig er lögð til breyting á 37. gr. frv. sem varðar geymslu og ráðstöfun vopna sem gerð hafa verið upptæk eða hald lagt á en nefndinni bárust ábendingar um að nauðsynlegt væri að í lögunum væri kveðið á um að ríkislögreglustjóri setti reglur um þetta efni þar sem nokkur misbrestur hefur verið á því að viðmið hafi verið til um geymslu slíkra vopna.
Loks er lögð til breyting á gildistökuákvæði og lagt til að lögin taki gildi 1. sept. 1998.
Virðulegi forseti. Nefndin stendur öll að afgreiðslu málsins en Valgerður Sverrisdóttir var fjarverandi við afgreiðslu þess.
