Steingrímur J. Sigfússon:
Herra forseti. Við kjósum að greiða ekki atkvæði með því að þetta frv. um lög á kjaradeilu sjómanna og útvegsmanna verði tekið fyrir með afbrigðum. Með því mótmælum við þeirri lagasetningargleði sem hæstv. ríkisstjórn hefur endurtekið orðið uppvís að. Þetta er í annað sinn á skömmum tíma sem hæstv. ríkisstjórn leggur fram frv. til að taka samningsréttinn af mönnum og binda enda á lögmætar aðgerðir í kjaradeilu með lagasetningu á Alþingi.
Eins er ljóst að í þessu frv. eru mjög umdeild atriði sem mikil andstaða er við. Frv., eins og það er lagt fram, boðar í 2. gr. íhlutun í tugi kjarasamninga hvað varðar ákvæði um fjölda í áhöfn og skiptahlut, þó að hæstv. sjútvrh. hafi að vísu hér áðan boðað breytingar sem eru til bóta á þessu atriði. Eftir stendur að til stendur að afnema samningsrétt og verkfallsrétt sjómanna í tvö ár. Með vísan til þessa greiðum við ekki atkvæði.