[prenta uppsett í dálka] 115. fundur, 122. lþ.
Sturla Böðvarsson (andsvar):
Herra forseti. Ég held að fleiri mættu taka sér það til fyrirmyndar að tala stutt í þinginu. Árangur yrði vafalaust ekkert minni af slíkum málflutningi.
En hvernig á að ná sátt? Það liggur fyrir. Hér er til umræðu frv. og brtt. frá hv. félmn. auk þess sem verið er að ræða ítrekað um hugsanlegar breytingar á skipulags- og byggingarlögum og þannig tel ég að við ættum að geta náð ásættanlegri niðurstöðu í málinu.
En ég ítreka það sem ég sagði fyrr að ég tel ekki skynsamlegt að þvinga í gegnum þingið á næstu dögum breytingum á skipulags- og byggingarlögum. Þetta er það mikilvægur lagabálkur að gefa verður fulltrúum sveitarfélaga færi á að veita umsagnir og koma til nefndar til þess að fjalla um málið þannig að enginn tími er til þess að gera þær breytingar.
