[prenta uppsett í dálka] 116. fundur, 122. lþ.
Fyrirspyrjandi (Sigríður A. Þórðardóttir):
Herra forseti. Ég þakka hæstv. ráðherra fyrir svörin. Það er ljóst að mjög markvisst er unnið að forvarnastarfinu. Mér finnst ánægjulegt að heyra um þessar nýjungar sem tóbaksvarnanefnd er með á sínum vegum og vænti þess að þær eigi eftir að skila miklum árangri.
En vegna þess að auðvitað er margbúið að sýna fram á hversu sterkt samband er milli reykinga og neyslu annarra vímuefna þá vil ég sérstaklega geta þess að það er von mín að áætlun ríkisstjórnarinnar ,,Ísland án eiturlyfja 2002`` skili árangri. Það má í raun og veru segja að styrkur þeirrar áætlunar er að hún beinist að því að virkja samtök foreldra, frjáls félagasamtök, íþrótta- og tómstundafélög og skóla, og alla þá sem starfa að þessum málum, til að sameina krafta sína gegn vímuefnaneyslu ungmenna og þar með reykingum.
