Bryndís Hlöðversdóttir (andsvar):
Herra forseti. Í verkalýðshreyfingunni sem er þverpólitísk hreyfing sem hefur starfað sem slík í áratugi er það ekki flokksskírteini sem stjórnar gerðum manna. Það er þetta grundvallaratriði sem hæstv. félmrh. virðist ekki hafa áttað sig á og er sorglegt vegna þess að innan félmrn. eru vinnumarkaðsmálin.
Mér fannst þetta merkileg yfirlýsing hjá ráðherranum áðan vegna þess að allt frá því hann tók við störfum sem félmrh. hefur hann verið í stöðugum útistöðum við verkalýðshreyfinguna. Það er ekki bara í þessu eina máli. Í hverju stórmálinu á fætur öðru á þessu kjörtímabili hefur hæstv. félmrh. sýnt það og sannað að hann hefur engan skilning á starfsemi verkalýðshreyfingarinnar og vill beinlínis ekki starfa í samstarfi við hana.
Ég held, herra forseti, að skýringin hafi kannski verið að koma í ljós hér í umræðunum áðan. Hæstv. ráðherra opinberaði að verkalýðshreyfingin væri í stjórnarandstöðu vegna þess að þar séu menn ekki með rétt flokksskírteini.