[prenta uppsett í dálka] 32. fundur
Ísólfur Gylfi Pálmason:
Herra forseti. Ég þakka hæstv. dómsmrh. fyrir svarið. Hins vegar fannst mér ekki koma nógu skýrt fram í svari hæstv. ráðherra hvort mögulegt væri að breyta þessu vegna þess að, eins og kom fram í fyrirspurn minni, þá er um ákveðna mismunun að ræða sem við ræðum ákaflega sjaldan. Þegar við berum saman höfuðborgarsvæðið og landsbyggðina gleymast þættir eins og þessir. Í nýrri skýrslu Byggðastofnunar, sem kynnt var í gær varðandi landsbyggðina og höfuðborgarsvæðið, kemur einmitt fram að menningarlíf á landsbyggðinni líður m.a. fyrir þetta --- að við erum að borga þarna kostnað sem ekki er lagður á hér á höfuðborgarsvæðinu. Og eins og kom skýrt fram í fyrirspurn minni þá er oft og tíðum um fjáröflun að ræða fyrir félagasamtök sem hefur síðan ómæld áhrif í viðkomandi byggðarlögum. Þess vegna hvet ég hæstv. dómsmrh. til að taka þetta til gaumgæfilegrar athugunar og breyta lögunum.
