Ögmundur Jónasson:
Hæstv. forseti. Á sama tíma og tekjur Atvinnuleysistryggingasjóðs eru skertar með lækkun tryggingagjalda eru auknar fjárhagsskuldbindingar settar á sjóðinn, hlutdeild í rekstri svæðisvinnumiðlana upp á 100 millj. kr. en áður hefur sjóðnum verið gert að fjármagna starfsmenntunarsjóð og atvinnusjóð kvenna. Sjóðurinn hefur ekki lengur ríkisábyrgð á bak við sig og er honum ætlað að vera sjálfbær. Þá þarf löggjafinn líka að tryggja að svo verði í reynd. Þetta lagaákvæði gengur í þveröfuga átt og ég greiði atkvæði gegn því.