Frsm. minni hluta fjárln. (Kristinn H. Gunnarsson) (andsvar):
Herra forseti. Ég hef ekki haldið því fram að það leysti öll vandamál að breyta skipan stjórna í sjúkrahúsunum. Hins vegar held ég að það muni hjálpa til við að ríkisstjórn á hverjum tíma geti framfylgt stefnu sinni. Ég er þeirrar skoðunar um rekstur sjúkrahúsanna í Reykjavík að auka þurfi samrekstur þeirra eins og ég gat um í ræðu minni. Ég var ekki að leggja þar til að það ætti að sameina þær stofnanir en ég tel að það þurfi að samreka þær í ríkara mæli en nú er til að koma í veg fyrir offjárfestingu og tvíverknað og kostnað sem af því hlýst og ég vitna til skýslu um VSÓ um það efni. Ég held að okkur sé full nauðsyn á því að grípa til þessara aðgerða.