Sjávarútvegsráðherra (Þorsteinn Pálsson) (andsvar):
Herra forseti. Þegar ég var að vitna til þess að stjórnarandstaðan hefði lýst því yfir að hún teldi óþarft að gera hér nokkuð í fjögur ár þá var ég að vitna til tillögu sem hv. 8. þm. Reykv. mælti fyrir í gær en dró svo til baka með málefnalegum og skýrum rökum í dag. En það stendur að það sjónarmið sem kemur fram í tillögunni hefur verið rauði þráðurinn í málflutningi flestra talsmanna stjórnarandstöðunnar. Það kann vel að vera að hv. 4. þm. Norðurl. e. sé á öðru máli. En aðrir talsmenn hafa sagt að það sé engin þörf á að gera neitt strax og menn eigi að hugsa sig um, og þessi tillaga lá fyrir um að menn ætluðu að hugsa sig um í fjögur ár.