Árni M. Mathiesen:
Herra forseti. Eftir að hafa hlustað á ræðu hv. málshefjanda er ekki annað hægt en að spyrja: Hverju er hv. þm. á móti? Hvað kom hv. þm. á óvart?
Það hafa verið vandamál í heilbrigðisþjónustu í Hafnarfirði og lausna á þeim vanda hefur verið leitað. Einn þáttur í lausnum á þeim vanda hefur verið frumkvæði bæjarins til að leggja fram hugmyndir um að Hafnarfjörður yrði reynslusveitarfélag á heilbrigðissviðinu. Eins og nú hefur komið fram hefur verið undirrituð viljayfirlýsing. Þar er um betri leið að ræða til að finna hagkvæma lausn á málefnum heilbrigðisþjónustunnar í Hafnarfirði en þá að gerast reynslusveitarfélag.
Ég verð eiginlega að spyrja hv. þm.: Hverju er hann á móti? Er hann á móti því að Hafnarfjörður hafi ríkari áhrif á stjórn heilbrigðismála í bænum? Er hann á móti því að Hafnfirðingar hafi meira um stjórn Sólvangs, stjórn heilsugæslunnar og stjórn St. Jósefsspítala að segja? Er hann á móti því að þeir sem eiga að njóta þjónustunnar hafi meiri áhrif á það hvernig henni er stýrt og hvernig hún er veitt en þeir hafa í dag? Um það snýst þetta mál. Það snýst ekki um það að hv. þm. er í prófkjöri, ég ætla að biðja ykkur að muna það. Það snýst um að heilsugæslan og heilbrigðisþjónustan í Hafnarfirði skiptir máli.
Varðandi það að bæjarstjórinn hafi verið umboðslaus þegar hann skrifaði undir viljayfirlýsingu --- ja, það má sjálfsagt deila um allt og toga allt saman. Ég ætla að minna hv. þingheim á það að samningur um yfirfærslu Sjúkrahúss Reykjavíkur frá Reykjavíkurborg til ríkisins, sem borgarstjórinn í Reykjavík undirritaði, hefur ekki enn þá verið tekinn fyrir í borgarráði eða borgarstjórn. (GÁS: Er það betra?)