Kristján Pálsson:
Herra forseti. Hv. málshefjandi, Guðmundur Árni Stefánsson, kemur með mál á dagskrá, á fyrsta fundi eftir nokkurt hlé, sem er alveg ótrúlega illa undirbúið. Það er til þess eins, eins og komið hefur fram, að ala á tortryggni gagnvart aðgerðum bæjaryfirvalda í málefnum sjúkrastofnana í Hafnarfirði. Það er hreint með ólíkindum að menn skuli leyfa sér að blanda prófkjöri samfylkingarinnar inn inn í svona mál og gera það tortryggilegt sem allir sem um þessi mál fjalla á vegum bæjarins eru sammála um. Það að hv. þm. skuli leyfa sér svona framkomu er hvorki honum né samfylkingunni sjálfri til framdráttar og hefur ekkert með heilbrigðismál á svæðinu að gera.
Ég mundi segja að hv. þm. ætti að draga þetta til baka og ræða við bæjaryfirvöld í Hafnarfirði um það sem er að gerast. Að efast um að bæjarstjórinn hafi heimild til þess að ræða um rekstur opinberra stofnana við ríkisvaldið er náttúrlega fyrir neðan allar hellur.