Tómas Ingi Olrich (andsvar):
Herra forseti. Það kom fram í ræðu hv. þm. Margrétar Frímannsdóttur að nú í fyrsta skipti í þessum sal yrði hún vör við breytingar á umræðunni um málefni Atlantshafsbandalagsins og öryggis- og varnarmál og nú yrðum við að fara að ræða þessi mál út frá breyttum aðstæðum, nú loksins. Þá vil ég spyrja: Gerir hv. þm. sér ekki grein fyrir því að frá árinu 1991 er búið að vinna á vegum Atlantshafsbandalagsins að endurskoðun á nánast allri starfsemi bandalagsins og tengslum bandalagsins við ríki Evrópu sem utan þess standa og sérstaklega fyrrverandi ríki Sovétríkjanna? Við höfum tekið þátt í þeim umræðum og þær umræður hafa farið fram á Alþingi á hverju einasta ári. Hvar hefur hv. þm. verið þegar við höfum rætt þetta í skýrslum utanrrh. á hverju einasta ári?