Heilbrigðisráðherra (Ingibjörg Pálmadóttir):
Virðulegi forseti. Ég vil fyrst taka það fram að auðvitað sinna hjúkrunarfræðingar hjúkrun fyrst og fremst.
Ég gat þess ekki í fyrra svari mínu að nú eru á annað hundrað hjúkrunarfræðingar í framhaldsnámi og það kemur auðvitað þungt niður á sjúkrahúsunum á meðan á því stendur. En ég á von á því að með vorinu skáni ástandið.
Hv. þm. Katrín Fjeldsted spurði hvort það væri ekki rétt að sjúkraliðar gætu starfað undir stjórn lækna. Það er þannig í nokkrum tilvikum. Það er ekki almennt en það er þannig í nokkrum tilvikum.
Eins og ég sagði áðan er verið að auka menntun sjúkraliða. Það hefur verið að gerast á undanförnum árum og þeir hafa í vaxandi mæli verið í ýmsum sérhæfðum störfum.