Frsm. minni hluta sjútvn. (Lúðvík Bergvinsson) (andsvar):
Virðulegi forseti. Maður er farinn að upplifa sjálfan sig aftur og aftur eins og maður sé að endurtaka það sem maður sagði í síðustu ræðu. Ég fer hægt yfir þetta, virðulegi forseti, mjög hægt.
Í fyrsta lagi vil ég segja það að minni hlutinn er fylgjandi því að hvalveiðar verði hafnar. Það er klárt. (Gripið fram í.) Það kemur fram í nál., hv. þm.
Í öðru lagi geldur minni hlutinn varhug við því að þeirri stríðsáætlun sé fylgt sem má finna í meirihlutaálitinu. Þess vegna telur minni hlutinn það ábyrgðarhlut að samþykkja þáltill. eins og hún lítur út. Við teljum, virðulegi forseti, að nær hefði verið að leggja fram tillögu í þá veru að við mundum hefja hvalveiðar eftir 2--3 ár og nota þann tíma til að kynna málstað okkar eins og til að mynda Norðmenn hafa gert. Þetta kom fram í ræðu minni, hv. þm., og ég legg til að hv. þm. fylgist betur með þeim umræðum sem fara fram svo við þurfum ekki vera að lengja umræðuna og endurtaka æ ofan í æ.