Guðjón Guðmundsson:
Herra forseti. Með samþykkt þessarar tillögu er skýrt kveðið á um að hvalveiðar skuli hefjast á ný og að ályktun Alþingis frá 2. febrúar árið 1983 standi ekki í vegi fyrir því. Þá kemur það fram í nál. meiri hluta sjútvn. að miðað sé við að veiðarnar hefjist ekki síðar en á næsta ári. Með samþykkt tillögunnar sér því fyrir endann á því hvalveiðibanni sem verið hefur hér í áratug.
Fram hafa komið mjög eindregnar óskir um að hvalveiðar verði hafnar frá öllum heildarsamtökum sjómanna og útvegsmanna, verkafólks og sveitarfélaganna í landinu auk fjölda annarra. Þá hafa ítrekaðar skoðanakannanir sýnt yfirburðastuðning landsmanna við hvalveiðar.
Með samþykkt þessarar tillögu er Alþingi því að verða við vilja þjóðarinnar í þessu máli.