![](http://www.althingi.is/myndir/althlit.gif)
Árni Steinar Jóhannsson (andsvar):
Herra forseti. Mér finnst menn gera ansi mikið úr því að ekkert verði til í rannsóknum í þágu læknavísindanna ef þetta frv. nær ekki fram að ganga. Ég veit ekki betur en að upplýsingar liggi úti um allt samfélagið. Þær eru að vísu ekki í miðlægum gagnagrunni en það er verið að vinna úr þessum upplýsingum á hverjum einasta degi og gengur bara bærilega. Átta menn sig ekki á því að þegar hafa hafið störf, að því er manni skilst, í kringum 200 manns? Og úr hvaða grunnum eru þeir að vinna? Auðvitað eru þeir að vinna úr gagnagrunnum sem eru til og margir aðrir eru að vinna eftir og vinna í og þeir munu halda því áfram.
Ég geri mér fulla grein fyrir því að það skilur á milli okkar, hv. þm. Péturs Blöndals og mín, því að ég vil að opinberir aðilar haldi um þessi mál. Ég vil ekki einkaleyfi. Ég vil ekki mónópól og þar skilur á milli.