Fyrirspyrjandi (Ísólfur Gylfi Pálmason):
Herra forseti. Ég beini fyrirspurn minni til hæstv. menntmrh. Fjarnám með tölvutækni er nýr lykill að möguleikum fólks til símenntunar. Ljóst er að í nútímasamfélagi verða þegnarnir aldrei fullnuma. T.d. er talað um það að 80--90% af nútímalæknisfræði hafi þróast á síðustu 10--15 árum. Fjarnám gerir fólki kleift að stunda nám í heimabyggð og er því mikilvægur þáttur í að efla búsetu á landsbyggðinni og eykur þannig möguleika og tækifæri fólks til símenntunar.
Í haust upplifði ég það að taka þátt í kennslustund í Menntaskólanum á Ísafirði þar sem kennsla fór fram í hjúkrunarfræði í beinni útsendingu frá Háskólanum á Akureyri. Fjarnám er því í raun háskóli í heimabyggð og opnar nýja og spennandi möguleika fyrir fólk á öllum aldri.
Hins vegar kemur þó fjarnám aldrei í staðinn fyrir hinn staðbundna skóla heldur er í raun og veru hrein viðbót. Þess vegna spyr ég hæstv. menntmrh.:
,,1. Hvaða skólar á framhalds- og háskólastigi bjóða fjarnám?
2. Hvaða kröfur eru gerðar til þeirra sem hyggjast stunda fjarnám á Íslandi?
3. Hvaða námsstigi er hægt að ljúka með fjarnámi á Íslandi og hvaða prófgráður veitir það?
4. Hverjir sækjast helst eftir fjarnámi og hvernig er skipting nemenda eftir aldri, kyni og búsetu?``