Tómas Ingi Olrich (andsvar):
Herra forseti. Ég held að ég hafi svipaða meðalheyrn og hv. þm. Össur Skarphéðinsson (ÖS: Slaka.) og ég hefði þá álitið að jafnvel það sem hann sagði, að fyrir lægi upplýst samþykki frá 70 þúsund einstaklingum, kæmi mér á óvart ef það er rétt. Ég er ekki að bera brigður á það en það kæmi mér mjög á óvart ef það er rétt.
Hitt skal ég segja að túlkun hv. þm. á því sem stendur á bls. 20, þ.e. um 7. gr., er rétt, ég dreg það ekki í efa. En að segja að sú túlkun takmarki hvað eigi að fara inn í grunninn, það get ég ekki fallist á og hann verður þá að lesa 3. gr. í skilgreiningunum og komast að þeirri niðurstöðu væntanlega með mér að ætlast er til þess að erfðafræðilegar upplýsingar gangi inn í þennan grunn.