Frsm. minni hluta umhvn. (Svavar Gestsson):
Herra forseti. Ég mæli fyrir áliti minni hluta umhvn. í þessu máli um landmælingar og kortagerð. Álitið er á þessa leið, með leyfi forseta:
,,Minni hluti nefndarinnar er algerlega andvígur vinnubrögðum meiri hluta Alþingis og umhverfisráðherra eins og þau hafa birst í þessu máli. Minni hlutinn telur hættu á því að í kjölfar meðferðar þess á Alþingi geti fylgt skaðabótakröfur á hendur ríkinu. Minni hlutinn telur að gefa hefði átt lengri tíma til að fjalla um málið. Minni hlutinn lýsir allri ábyrgð á hendur ríkisstjórninni og lýsir andstöðu við málið. Minni hlutinn á þess ekki kost að stöðva málið þar sem meiri hlutinn er staðráðinn í því að koma því í gegnum þingið strax í nótt.``
Undir minnihlutaálitið rita 20. des. 1998 Svavar Gestsson, Steingrímur J. Sigfússon og Lúðvík Bergvinsson.