Katrín Fjeldsted (andsvar):
Herra forseti. Já, ég féll í sömu gryfju og kollegar mínir og í þeirri gryfju fer ágætlega um mig. Kollegar mínir víða um lönd eru í þeirri gryfju og ætla að vera í henni áfram, svona eins konar skotgröfum má segja. Þeir vinna að því eins og hægt er að koma hnefaleikum út af Ólympíuleikunum. Við teljum að það hljóti að vera æskilegt.
Ég tel að hægt sé að bera þessar tvær hliðar hnefaleika saman hvað varðar höfuðáverka, hvað varðar augnslys og hvað varðar árásargirni. Þetta þrennt kemur fram bæði hjá atvinnumönnum og áhugamönnum í þessari íþrótt. Ég verð að segja að leiknin eða færnin að komast inn fyrir vörn andstæðingsins er að koma höggi á höfuðið og búkinn, það er markmiðið. Og hafa til þess bara þrjár eða fjórar mínútur þurfa menn að vera því snarpari og hraðari til að geta komið fleiri höggum á mínútu en í atvinnuboxi.