Jón Kristjánsson:
Herra forseti. Það er margt sem maður verður áheyrandi að við umræður á hv. Alþingi en hv. 5. þm. Reykv. sagði áðan á þessa leið að hann undraðist að ráðherrar skuli flýja í skjól laga, hlutafélagalaga og laga um bankaleynd. Ég vil vekja athygli á því að ráðherrar eiga að fara eftir lögum og þingmenn eiga líka að fara eftir lögum. Það á að fara eftir þeim lögum sem eru í gildi og að sjálfsögðu athugar ráðherra hvaða lög eru í gildi áður en hann svarar spurningum sem þessari. (JóhS: Þetta er útúrsnúningur, hv. þm.)