Margrét Frímannsdóttir:
Virðulegi forseti. Ég þakka hv. þm. Steingrími J. Sigfússyni fyrir að taka þetta mál upp. Við í Samfylkingunni höfum stutt það og lagt til að farið verði í heildarendurskoðun á skattlagningu á umferð með tilliti til umhverfissjónarmiða og skattlagningunni breytt. Þess misskilnings hefur að vísu gætt hjá hv. þm. Sjálfstfl., sem stýrir því kannski að menn hafa ekki viljað fara í endurskoðunina, að slík endurskoðun muni leiða af sér hærri skattlagningu. Þannig er það ekki.
Mér þykir leitt að heyra hjá hæstv. ráðherra að ekki eigi að fara í heildarendurskoðun á skattlagningu umferðarinnar, með tilliti til umhverfissjónarmiða en ekki síður vegna þess að nú er eldsneytisverð í sögulegu hámarki. Mikil umræða hefur átt sér stað um skattlagninguna og það er þörf á að fara í þessa endurskoðunarvinnu.