![](http://www.althingi.is/myndir/althlit.gif)
Guðrún Ögmundsdóttir (andsvar):
Virðulegur forseti. Ég skal með mikilli ánægju skýra þetta út fyrir hv. þm. Ástu Möller. Þegar ég tala um leitarstarf þá meina ég leitarstarf í unglingamálum eins og praktíserað hefur verið á öllu höfuðborgarsvæðinu. Þá er unnið með skólum og æskulýðsmiðstöðvunum eins og verið hefur í Reykjavík. Kannski mætti kalla það unglingaleitarstarf á hjólum. Við þekkjum leitarstarfið sem verið hefur hér í miðbænum til langs tíma. Þetta er spurning um að útvíkka það yfir í hverfin og setja þetta þarna inn. Þetta eru raunhæfar aðgerðir varðandi þennan aldurshóp. Þetta hefur verið gert sem átaksverkefni í ýmsum hverfum og á landsbyggðinni og hefur gefist alveg gríðarlega vel.