Ögmundur Jónasson (andsvar):
Herra forseti. Það er margt sem ég virði vissulega í Evrópusamstarfinu, samstarfi Evrópuríkja, og heimurinn lítur að mörgu leyti öðruvísi út og leit öðruvísi út á rústum stríðshrjáðrar Evrópu eftir lok heimsstyrjaldarinnar síðari. Það er margt sem ég skil út frá hagsmunum meginlandsbúa. En þannig eigum við líka að líta á málin. Við eigum að líta á málin út frá hagsmunum okkar Íslendinga og láta aðra um að líta á málin og skoða þau út frá hagsmunum meginlands Evrópu. Þeir eru bara ólíkir.