Ögmundur Jónasson:
Herra forseti. Þingmenn þingflokks Vinstri hreyfingarinnar -- græns framboðs munu sitja hjá við atkvæðagreiðslu um þau tvö frv. sem verða nú greidd atkvæði um og leiðir af Schengen-samningnum. Með þessum lagafrv. er verið að færa mikið vald undir embætti ríkislögreglustjóra án þess að veita embættinu eðlilegt aðhald. Ríkislögreglustjóri á að sjá til þess að þættir sem eru mjög matskenndir eru færðir inn í evrópskan öryggisgrunn. Þar er t.d. um að ræða meinta ofbeldishneigð eða hvort einstaklingar séu líklegir til skemmdarverka. Aðhald er ekki nægilegt frá tölvunefnd eða Persónuvernd, þar er allt óunnið og á að koma í reglugerðum. Þingmenn Vinstri hreyfingarinnar -- græns framboðs á Alþingi hafa reynt að hafa áhrif á vinnslu málsins og munu að sjálfsögðu freista þess fram á síðustu stundu, en við erum eftir sem áður andvíg pakkanum í heild sinni.