Frsm. efh.- og viðskn. (Vilhjálmur Egilsson):
Hæstv. forseti. Ég mæli fyrir frv. til laga um breytingu á vaxtalögum, nr. 25/1987, með síðari breytingum. Það er efh.- og viðskn. sem flytur þetta frv. Frv. er þrjár greinar.
1. gr. felst í því að Seðlabanki Íslands skuli setja nánari reglur um verðtryggingu sparifjár og lánsfjár. Sú grein er ekki efnisleg breyting frá því fyrirkomulagi sem nú er.
Í 2. gr. frv. er fjallað um að Fjármálaeftirlitinu sé heimilt að setja reglur um jöfnuð verðtryggðra eigna og skulda viðskiptabanka, sparisjóða og annarra lánastofnana og geti beitt viðskiptabanka, sparisjóði og aðrar lánastofnanir viðurlögum á þann hátt sem mælt er fyrir í lögum um opinbert eftirlit með fjármálastarfsemi ef ekki er farið eftir reglunum. Í þessari grein er verið að skipta um hlutverk þannig að í stað Seðlabankans, sem hefur þetta hlutverk samkvæmt núgildandi lögum, verði Fjármálaeftirlitinu falið hlutverkið.
Í 3. gr. segir að lög þessi öðlist þegar gildi.
Hæstv. forseti. Frv. þetta er flutt í tengslum við þær breytingar sem verið er að gera á lögum um fjármálaeftirlit og það er tillaga um að frv. fari beint til 2. umr. þar sem efh.- og viðskn. flytur það.