Hjálmar Jónsson (andsvar):
Herra forseti. Hv. þm. vitnar í Biblíuna máli sínu til stuðnings og það er vissulega gott. Hann sagði áðan að hömlur væru á innflutningi landbúnaðarafurða. Það er alveg rétt vegna þess að engin þjóð er tilbúin að fórna landbúnaði sínum fyrir frjálsan innflutning. Við erum aðilar að GATT-samkomulaginu og förum þar fram með öðrum þjóðum. Sumar þjóðir styrkja landbúnað sinn meira en við gerum. Aðrar þjóðir styrkja sinn landbúnað minna. Við erum ekkert á slæmu róli í því. Við erum heldur ekki að styrkja beinlínis landbúnað heldur erum við að gera íslenskan landbúnað samkeppnishæfan á matvælamarkaðnum.
Hvað varðar bændur, greindina og heiðarleikann, þá eru þeir líka svo skynsamir að þeir munu ekki gerast leiguliðar hjá hv. þm. Pétri H. Blöndal.