[prenta uppsett í dálka] 95. fundur, 125. lþ.
Ögmundur Jónasson:
Herra forseti. Ástæða er til að árétta afstöðu Vinstri hreyfingarinnar -- græns framboðs til Schengen-samkomulagsins. Við erum andvíg því að Íslendingar gerist aðilar að þessum samningum. Fram hafa komið hjá stjórnskipaðri nefnd fullyrðingar um að þetta samkomulag sé mjög óhagkvæmt, bjóði upp á óhagræði og óhagkvæmni fyrir íslenska ferðaþjónustu og hafi í för með sér ómældan kostnað fyrir íslenska skattgreiðendur.
Þessar fullyrðingar koma fram án þess að þeim sé á nokkurn hátt svarað af hálfu ríkisstjórnarinnar eða stjórnarmeirihlutans á Alþingi. Auk þess er að finna í þeim lögum sem er fylgifrv. með Schengen-samkomulaginu ámælisverða hluti. Ekki er nægilega staðið að persónuvernd gagnvart embætti ríkislögreglustjóra. Við þingmenn Vinstri hreyfingarinnar -- græns framboðs getum því ekki stutt þessi frumvörp.
