[prenta uppsett í dálka] 109. fundur, 125. lþ.
Margrét Frímannsdóttir (andsvar):
Virðulegi forseti. Það er vissulega rétt hjá hv. þm. Pétri Blöndal að líklega eru ekki miklar líkur til þess að þeir sem eru undir skattleysismörkum greiði inn í lífeyrissjóði. En það er ekki vegna þess að þeir þurfi endilega hvatningu til þess heldur vegna þess að þeir eru á allt of lágum launum og hafa ekki afgang til þess að greiða í lífeyrissjóði og það er vandamál sem þarf að taka á annars staðar.
Það er líka rétt hjá hv. þm. að hér er um ákveðna stýringu að ræða. Það er verið að stýra fjármunum inn í lífeyrissjóðina og ég tel að við þurfum í beinu framhaldi af því að herða reglur um ráðstöfun á því fjármagni sem lífeyrissjóðirnir hafa og eftirlit sem um það gildir og að sjóðfélagar eigi rétt á þeim upplýsingum sem beðið er um hverju sinni um það hvernig það fé er ávaxtað.
