![](http://www.althingi.is/myndir/althlit.gif)
Ögmundur Jónasson (andsvar):
Herra forseti. Ég var að lýsa vantrausti og mjög harðri gagnrýni á ákvörðun ríkisstjórnarinnar og eins tiltekins ráðherra að reka vísindasiðanefnd þegar hún gagnrýndi ákvarðanir og stefnu ríkisstjórnarinnar, breyta reglugerð og skipa nefnd. Ég er að lýsa vantrausti á þá ráðstöfun. Ég hef gert það áður og skal gera það hvenær sem þess er óskað og fagna tilefninu að fá að ítreka þetta eina ferðina enn því að þarna var á ferðinni mjög alvarlegur hlutur.
Það er alveg rétt sem hv. þm. Þorgerður Gunnarsdóttir bendir á að menn geta farið í alls kyns hártoganir um þessi efni en eftir stendur að upplýsingar um heilsufar íslensku þjóðarinnar eru að henni forspurðri sendar inn í gagnagrunn á heilbrigðissviði þar sem þær eru gerðar að söluvöru.