Utanríkisráðherra (Halldór Ásgrímsson) (andsvar):
Herra forseti. Mér dettur ekki í hugar að hv. alþingismenn á Alþingi Íslendinga séu í málflutningi sínum á einhvern hátt að huga að öðru en íslenskum hagsmunum. En það er nú alltaf svo að menn kunna að hafa mismunandi skoðanir á því hvað séu íslenskir hagsmunir í þessu máli. Ég vænti þess að hv. alþingismenn treysti því jafnframt að sá sem hér stendur hafi ekkert annað í huga í þessu máli. Mér finnst því óþarfi af okkur að vera að færa þetta mál inn á þá braut og er sammála hv. þm. Sighvati Björgvinssyni um það.
Hins vegar er alveg ljóst að því er varðar þetta skipaflutningamál að það er ekkert nýtt mál og við höfum verið lengi í viðræðum og skoðanaskiptum við Bandaríkjamenn um það. Þetta dómsmál í Bandaríkjunum hefur engin áhrif á þá atburðarás af okkar hálfu. Hins vegar er rétt að við höfum lagt fram greinargerð um skoðun okkar í því máli. En það frv. sem hér er lagt fyrir er ekki í neinum tengslum við þann málatilbúnað.
Viðbrögð okkar eru byggð á þeim samskiptum sem við höfum átt við Bandaríkjamenn og m.a. hvatningu þeirra til að setja reglur í þessu sambandi þannig að það kemur ekki beint við þeim málatilbúnaði sem hefur verið af hálfu Eimskipafélags Íslands fyrir dómstólum í Bandaríkjunum.