Guðjón A. Kristjánsson (andsvar):
Herra forseti. Ég kom bara í pontu til þess að mótmæla þeim orðum sem hér voru viðhöfð, a.m.k. hvað mig varðar sem einn flutningsmanna þessa frv., að ég væri á einhvern hátt að lítillækka forsetaembættið. Ég tel það alls ekki vera. Ég tel að það sé mjög gott mál að leitt verði í ljós hver hin raunverulegu kjör forsetaembættisins eru. Ef þau eru raunverulega 1,2--1,3 millj. þá tel ég að forsetinn sé vel að þeim kominn og vonandi verða honum úrskurðuð þau laun.