![](http://www.althingi.is/myndir/althlit.gif)
Flm. (Kolbrún Halldórsdóttir) (andsvar):
Herra forseti. Ég þakka hv. þm. fyrir þessa spurningu. Að sjálfsögðu mundi ég una þeirri niðurstöðu sem kæmi í ljós eftir þetta mat. Hitt má öllum vera ljóst og mér er engin dul að segja frá því hér hver mín skoðun er á þessari virkjun. Hún er sú að af þessari virkjun ætti ekki að verða að svo komnu máli vegna þess að ég tel skynsamlegt að Fljótsdalsvirkjun heyri undir rammaáætlun ríkisstjórnarinnar Maður -- nýting -- náttúra. Ég tel að við eigum að skoða alla virkjanakosti sem mögulegir eru í landinu undir því verkefni, líka Fljótsdalsvirkjun. Mér finnst það glapræði að undanskilja Fljótsdalsvirkjun vegna þess að raskið sem af henni yrði á hálendinu norðan Vatnajökuls er óafturkræft og þar með er lagt út í framkvæmd sem mundi hrófla við miklu meiru því að á spýtunni hangir Kárahnjúkavirkjun, möguleg Kreppuvirkjun, Bjarnarflag og hvað vitum við með Arnardalslón og virkjun Jökulsár á Fjöllum?
Mín skoðun er sú að bíða eigi með allar virkjanir. Við eigum að setjast niður og ræða málin og loka þessum skóflukjafti Fljótsdalsvirkjunar sem gín yfir höfðum okkar núna.