Rannveig Guðmundsdóttir (andsvar):
Virðulegi forseti. Þingmaðurinn hefur ekki tekið mjög vel eftir orðum mínum. Ég var ekki að lýsa þekkingu minni á málefnum í Sviss heldur var ég að nefna að ýmsir sem hefðu fjallað um framtíð Evrópumála teldu mjög líklegt að innan tveggja eða þriggja ára mundi Sviss leita eftir inngöngu í Evrópusambandið. Jafnframt sagði ég að ef Sviss gerði það væri líklegt að Noregur mundi reyna í þriðja skiptið. Þetta liggur í spilunum að mati þeirra sem hafa verið að skoða Evrópumálin.
Ég nefndi það hins vegar sjálf að nú mætti vel vera að þessar vangaveltur hefðu breyst eftir kosningarnar í Sviss. Við vitum að það urðu mjög óvænt úrslit í kosningunum í Sviss og margir tengdu niðurstöður þeirra kosninga við hugsanlega afstöðu til Evrópumálanna. Þannig lagði ég málið upp. Ég get því miður ekki sagt hvað er að gerast í Sviss. Ég hef ekki þekkingu á þeim málum.