![](http://www.althingi.is/myndir/althlit.gif)
Ögmundur Jónasson (andsvar):
Herra forseti. Ég vil byrja á því að þakka hv. þm. Árna Johnsen fyrir sérlega fróðlegt og málefnalegt framlag til þessarar umræðu. ,,Allt orkar tvímælis``, ,,margt í mörgu``, ,,myglingur``, og ,,menn sjá ekki út úr augunum``. Reyndar áfellist ég ekki hv. þm. Árna Johnsen fyrir að eiga erfitt með að átta sig á þessu máli vegna þess að það er ekki fyrr en nú að hann kemur að þessari umræðu sem hér hefur staðið í marga daga. En ég skal þó ekki taka fyrir það að í hv. þm. kunni að leynast glöggur lögskýrandi. Nú hefur hann fengið mikla uppljómun í bréfi sem Garðar Gíslason, forseti Hæstaréttar, ritar Halldóri Blöndal í dag.
Það hefur verið tekist á um það í þessari umræðu hvort með dómi Hæstaréttar sé úthýst öllum tekjutengingum í skatta- og velferðarkerfinu. Við höfum haldið því fram við umræðuna að svo væri ekki. Ég fæ ekki betur séð en að í bréfi forseta Hæstaréttar sé þessi niðurstaða okkar staðfest. Dómurinn stendur.