[24:14]

Utanríkisráðherra (Halldór Ásgrímsson) (andsvar):

Herra forseti. Hv. þm. er ekki að biðja um, að mínu mati, að farið sé að dómnum. Hann er að biðja um að ríkisstjórnin og meiri hluti Alþingis samþykki að öllu leyti kröfugerð þess sem flutti málið fyrir Hæstarétti. (Gripið fram í: Þeir unnu.) Það er hv. þm. er að segja hér. (Gripið fram í: Þannig var dómsorðið.) Þannig var dómsorðið ekki. (ÖJ: Þeir unnu málið.) (SJS: Þeir unnu málið, utanrrh.) (Gripið fram í.)

Herra forseti. Það er verið að biðja mig, herra forseti, að svara spurningum og ég hef reynt að svara spurningum í nokkra daga. En það gengur heldur illa vegna þess að hv. þingmenn eru mjög órólegir í sætum sínum. Þetta er náttúrlega kjarni málsins og ég ætla ekkert að fara fleiri orðum um það enda hef ég flutt um það allmargar ræður og svarað spurningunum aftur og aftur. En því miður fæ ég alltaf sömu frammíköllin sem ég skil ekki alveg. Ég skil ekki þennan óróa sem er í hv. þingmönnum. (Gripið fram í: Það er voðalega skrýtið, eða hvað?) Já, mjög skrýtið.