Forseti (Halldór Blöndal):
Vegna ummæla hv. þm. og vegna þeirrar bókunar sem kynnt var af 1. varaforseta Alþingis tel ég nauðsynlegt að kynna bókun sem ég gerði á næstsíðasta fundi forsn.
,,Eins og sést af bréfum forseta Alþingis í umboði forsætisnefndar og forseta Hæstaréttar er farið efnislega rangt með innihald þeirra í bókun Guðmundar Árna Stefánssonar. Ég harma einnig að í viðtölum við tvo forsætisnefndarmenn í fjölmiðlum skuli farið rangt með staðreyndir.
Ef forseti Alþingis boðar til fundar í forsætisnefnd og meiri hluti er mættur er sá fundur ályktunarbær og menn hafa ekki tillögurétt á slíkum fundum sem fjarverandi eru fremur en í sölum Alþingis almennt. Ég vonast til að geta átt gott samstarf við forsætisnefndarmenn í framtíðinni.``
Þetta er sú bókun sem ég lét gera og er skýr og kemur að efni málsins.