Kolbrún Halldórsdóttir (andsvar):
Herra forseti. Ég þakka hv. þm. Hjálmari Árnasyni fyrir þá hugarfró sem hann veitir mér með því að rifja upp að Landssími Íslands ætli að ISDN-væða landið allt innan þeirra tímamarka sem hv. þm. nefndi. Það breytir þó ekki því að í greinargerð útvarpsstjóra Ríkisútvarpsins með þessu frv. kemur fram að búnaður fyrir þjónustuna sem hér um ræðir, þ.e. að gera fólki kleift að taka á móti sjónvarpsútsendingum í gegnum ISDN-kerfið, er á þróunarstigi. Það kemur sömuleiðis fram í greinargerðinni að það sé óvíst í hversu miklum mæli hann muni henta á þeim sveitabæjum sem hér um ræðir. Hér er hins vegar látið að því liggja að menn treysti á tæknina því þróunin í þessum tæknimálum sé ör. Það virðist því alveg ljóst á orðum útvarpsstjóra að það sé alls ekki búið að tryggja, þó ISDN-væðing landsins verði að veruleika innan einhvers tímafrests, að hægt verði að nota þá tækni sem ISDN-væðingin býður upp á til að taka á móti sjónvarpsútsendingum.