Þórunn Sveinbjarnardóttir:
Hæstv. forseti. Tilefni þess að ég kem hér upp er aukin almenn umræða í samfélaginu sem ber keim vaxandi andúðar í garð þeirra sem búsettir eru hér á landi og eru ekki fæddir á Íslandi, þ.e. útlendinga sem búsettir eru hér á landi eða dvelja hér tímabundið vegna atvinnu. Nú á dögunum var m.a. viðhafnarviðtal í dagblaði einu við einn forkólfa félags sem kallar sig Félag íslenskra þjóðernissinna og í gær mátti hlýða á umfjöllun í sjónvarpsstöð þar sem rætt var við annan mann úr því félagi.
Því má halda fram, herra forseti, að útlendingaandúðin á Íslandi sé komin úr felum. Það er í sjálfu sér fagnaðarefni þó að það kunni að hljóma ankannalega því að þar með er hægt að takast á við vandann. Af þessu tilefni leyfi ég mér að spyrja hæstv. dómsmrh. hvort og þá hvaða aðgerða ríkisstjórnin hyggist grípa til til þess að spyrna við slíkri óheillaþróun.