![](http://www.althingi.is/myndir/althlit.gif)
Pétur H. Blöndal (andsvar):
Herra forseti. Það er rétt að stofnfjáreigendur voru fyrst ábyrgðarmenn og tóku á sig skuldbindingar sem skyldu en ekki í hagnaðarskyni. Þeir hafa hingað til verið mjög hlutlausir í þessu dæmi en með frv. og breytingum sem hér eru lagðar til eru þeir allt í einu komnir með mikla hagsmuni á sína könnu. Hjá sumum sparisjóðunum er það reyndar ekki neitt, af því að stofnféð er lægra en eigið fé, en í öðrum nemur féð 2 millj. á mann og jafnvel upp í 36 millj. á mann. Þegar hagsmunirnir eru orðnir svona miklir þá er alltaf hætta á hinu, herra forseti, sem er bara hluti af mannlegu eðli. Auðvitað er í flestum stofnunum gott og gegnt fólk en hér er verið að búa til leikreglur sem eru þannig að það munu koma tilboð frá einhverjum sem vill eignast stóran hlut í þessum hlutafélögum og þau verða talsvert há.