[prenta uppsett í dálka] 111. fundur, 126. lþ.
Ögmundur Jónasson:
Herra forseti. Hér er verið að greiða atkvæði um lagagrein sem er til komin vegna misskilnings á tilskipun Evrópusambandsins og kveður á um bann við hlerun á símtölum og fjarskiptum. Um slíkt bann eru allir sammála.
Hið umdeilda ákvæði lýtur að banni við því að símtöl séu tekin upp á segulband. Í stað þess að fella þetta ákvæði í lögum niður og taka á hvers kyns misnotkun á markvissan hátt í viðeigandi lögum, þá er með þessari lagagrein verið að spinna inn hin undarlegustu heimildarákvæði fyrir banka og fréttastofur. Þessir aðilar geta tilkynnt í eitt skipti fyrir öll að segulbandsupptökur séu notaðar en viðskiptavinir þeirra, bankanna og viðmælendur fréttamanna, hafa annan og lakari rétt. Og viti menn: Þeir sem verða fyrir símaofsóknum mega ekki taka upp samtal ofsóknarmannsins nema tilkynna honum áður að segulband sé notað. Menn eru komnir út á mjög hálan ís með þessari lagasetningu að ekki sé minnst á lögskýringargögnin sem vísað er til í þessu sambandi.
Ég mun greiða atkvæði gegn þessu en boða brtt. við 3. umr. á grundvelli frv. sem ég hef þegar talað fyrir.
