![](http://www.althingi.is/myndir/althlit.gif)
Samgönguráðherra (Sturla Böðvarsson) (andsvar):
Herra forseti. Ég heyri hvað hv. þm. Ögmundur Jónasson segir og held að það eigi eftir að koma honum á óvart hversu mikill áhugi er í þjóðfélaginu fyrir þessari sölu á hlutabréfum í Landssíma Íslands. Mér segja þeir ráðgjafar sem ég hef kallað til mín af fjármálamarkaði að áhugasömustu aðilarnir á Íslandi í dag hvað varðar sölu á hlutabréfum í Landssímanum séu forsvarsmenn lífeyrissjóðanna í landinu, þeir sjái fyrir sér fjárfestingu í Símanum sem mjög góðan kost til þess að dreifa hagsmunum lífeyrissjóðanna sem víðast, skapa fleiri stoðir undir góðri afkomu lífeyrissjóðanna til framtíðar og um leið tryggingu fyrir félaga í þessum lífeyrissjóðum. Mjög margir meta það svo að fjárfestar á Íslandi og þá ekki síst lífeyrissjóðirnir ýti fremur á sölu á hlutabréfum í Landssímanum en dragi úr.