[25:01]

Samgönguráðherra (Sturla Böðvarsson) (andsvar):

Herra forseti. Það er alveg ljóst að á því verkefni að lækka kostnað við gagnaflutninga er ekkert verið að byrja núna. Ekki er verið að byrja á því verkefni á grundvelli álits meiri hluta samgn. Alþingis. Í samgrn. og í samstarfi við símafyrirtækin hefur verið unnið að þessu. Má m.a. benda á þann samning sem er nú fylgiskjal með frv. og gerður var á milli samgrh. og Landssíma Íslands sem gengur út á að lækka verulega gagnaflutninga um hið svokallaða ATM-net. Með þeim samningi var stigið geysilega mikilvægt skref. Með því er grunnkerfi Símans notað og þessi árangur hefur náðst.

Næstu mikilvægu skrefin sem ég tel að þurfi að stíga og vinna að eru að leita úrlausna um hvernig megi lækka leigulínukostnaðinn. Þar eru engar einfaldar leiðir, en nú þegar, með samkeppni sem birtist m.a. í samningnum um rannsóknanetið svokallaða, sjáum við á hvaða leið við erum. Það er þá fyrst og fremst spurning um skilgreiningar sem við þurfum að huga að, fyrir utan það að herða á því að koma á samkeppni. Það er fyrst og fremst verkefni okkar.

Ég mun koma í síðara svari mínu inn á seinni hlutann af spurningu hv. þm.