Þórunn Sveinbjarnardóttir (andsvar):
Herra forseti. Mér er nær að halda að innan Vinstri hreyfingarinnar -- græns framboðs ríki hræðsla við það að umræðan um Evrópumálin á Íslandi og væntanlega nánara samstarf við Evrópusambandið, sem færi lýðræðislega fram bæði á hinu háa Alþingi og úti í samfélaginu, gæti leitt til niðurstöðu sem vinstri grænum líkaði ekki. (Gripið fram í.) Það skyldi þó aldrei vera að slík hræðsla ríki í Vinstri hreyfingunni -- grænu framboði? (Gripið fram í.) Ég vil líka upplýsa hv. þm. Árna Steinar Jóhannsson --- það er eiginlega hvimleitt, forseti, hvernig menn grípa sýknt og heilagt fram í fyrir manni þegar maður er í ræðustól hins háa Alþingis --- ég vil upplýsa hv. þm. um að ég gef mér ekki þessa niðurstöðu af vinnu Samfylkingarinnar fyrir fram.