![](http://www.althingi.is/myndir/althlit.gif)
Ögmundur Jónasson (andsvar):
Herra forseti. Aðeins til að upplýsa hv. þm. Þórunni Sveinbjarnardóttur sem finnst erfitt að skilja málflutning minn. Ég er að leggja það til að í stað þess að prjóna við 3. mgr. 44. gr. laganna eins og það frv. sem hér er til umræðu byggir á þá legg ég til að þessi 3. mgr. verði felld niður vegna þess að ég tel rangt að setja það í landslög að bannað verði að hljóðrita samtöl án þess að viðmælanda hafi verið tilkynnt það í upphafi og ég hef fært rök fyrir því. Þetta er vinnugagn, vinnutæki fréttamanna, og óeðlilegt að setja þetta í landslög á þennan hátt.
Hv. þm. telur rétt að hafa meðalhófið í heiðri. Ég hefði haldið að það væri kannski nær lagi að hafa skynsemina að leiðarljósi.