Þorgerður K. Gunnarsdóttir (andsvar):
Herra forseti. Það er alla vega ánægjulegt að heyra að hv. þm. Gísli Einarsson er ánægður með nýveiturnar og fyrirkomulagið þar. En varðandi gamalveiturnar þá bý ég sjálf í gömlu húsi í Hafnarfirði, byggðu 1931. Enn er nokkrum hlutum ábótavant hjá mér en ég hef eftirlit með því og læt löggilta rafverktaka fara yfir þetta. Ég veit að það er kominn tími á að skipta um hjá mér, alveg eins og ég hef í gegnum tíðina fylgst með hitavatnslögnum í mínu gamla húsi sem þegar hafa valdið mér óbætanlegu tjóni.
En ég get alveg tekið undir það með hv. þm. Gísla Einarssyni að ef verulegar athugasemdir eru við það hvernig fyrirkomulagi á gamalveitum er háttað og eftirliti þar er verulega ábótavant --- og þá er ég ekki að tala um þessa könnun. Mér finnst hún ekki vera plagg í þessu máli. Það er mín skoðun. En ef aðrar rökstuddar ábendingar hafa komið fram í því að eftirliti með þessum gamalveitum sé ábótavant þá get ég tekið undir það að beina þeim ábendingum til hæstv. iðn.- og viðskrh. að kanna það mál sérstaklega. En ég sé ekki endilega ástæðu til þess að skipa nefnd í það mál.