[prenta uppsett í dálka] 24. fundur, 126. lþ.
Utanríkisráðherra (Halldór Ásgrímsson) (andsvar):
Herra forseti. Aðalatriðið í þessu máli er sú staðreynd að þessi fátækustu ríki heims eru svo skuldug að þau geta sig hvergi hreyft. Þau eru bundin á skuldaklafa. Með því að létta skuldunum af þeim eru opnaðir nýir möguleikar til sjálfsstjórnar þeirra og sjálfsforræðis. Það er aðalatriðið. Auðvitað get ég tekið undir það að ekki á að neyða menn til þess að einkavæða samfélagsþjónustu sína enda er ekki verið að því. Það er ekki verið að neyða menn til þess, það er rangt.
Hitt er svo annað mál að margt af því sem hv. þm. nefndi mundi falla undir samfélagsþjónustu, ég get tekið undir það. Fjarskipti og margt annað er á sviði þar sem einkageirinn er farinn að fjárfesta mjög mikið og það má segja í vaxandi mæli um nokkra aðra þætti þar sem alþjóðavæðingin hefur breytt umhverfinu. Það er að sjálfsögðu mikilvægt að þessi þróunarríki geti tekið þátt í því, geti verið með í alþjóðavæðingunni og nýtt sér nútímafjarskipti sem eru undirstaða allra framfara í heiminum svo dæmi sé nefnt. Þetta eru grundvallaratriði. Ég tel að Íslendingar og önnur Norðurlönd hafi verið með réttar áherslur í þessum efnum. Aðalatriðið er að þetta verk er komið vel á veg. Ég tel að þetta sé a.m.k. í fyrsta skipti sem einhver ný von er fyrir þessi fátækustu ríki.
