Ögmundur Jónasson (andsvar):
Herra forseti. Ég vil gera athugasemdir við tvennt í máli hv. þm. Gunnars Birgissonar. Í fyrsta lagi hvetur hann okkur til að ræða í sama vetfanginu breytingar á barnabótum og breytingar á útsvari, tekjuskattsbreytingar og breytingar á álagningarstofni fasteignagjalds.
Í þessu sambandi vil ég minna á enn og aftur, vegna þess að þessi atriði í málafylgju stjórnarmeirihlutans eru mjög þrálát, að ríkisstjórnin ætlar á næstu þremur árum að skila aðeins hluta af því sem tekið hefur verið af barnafólki á liðnum árum.
Varðandi þann þáttinn sem ríkisstjórnin stærir sig mest af, ótekjutengda hlutanum, sem á að verða 33 þús. kr. fyrir börn fram að sjö ára aldri, þá var ótekjutengdi hlutinn fyrir fimm árum að jafnaði 40 þús. kr. --- ekki fram að sjö ára aldri heldur 16 ára aldri.