Ásta Möller (andsvar):
Herra forseti. Með þeirri tillögu sem hér er lögð fram er ekki gert ráð fyrir að neinar breytingar verði á sköttum eða tollum á áfengi þannig að það breytist ekki neitt. Hagnaður ríkisins verður hinn sami.
Annað atriði er að ríkið á náttúrlega ekki að standa í samkeppnisrekstri. Þegar verið er að færa þessa verslun út til smásölunnar, til einkaaðila, þá er alveg ljóst að fólk fer að velta fyrir sér hvar besta þjónustan sé. Í mínum huga er alveg ljóst að ÁTVR mun veikjast verulega og ég sé hreinlega ekkert því til fyrirstöðu að það gerist. Ég sé ekki í rauninni þörf fyrir ÁTVR eftir að þessi breyting verður komin á.
Þessi breyting, eins og svo margt í áfengismálum Íslendinga, er hægfara og við munum bara skoða og sjá hver framtíðin verður í þessum efnum.