![](http://www.althingi.is/myndir/althlit.gif)
Frsm. meiri hluta menntmn. (Sigríður A. Þórðardóttir) (andsvar):
Eins og ég kom að áðan, herra forseti, er ljóst að meiri hluti menntmn. var löngu búinn að móta afstöðu sína í þessu máli. Það er engin ástæða til þess hins vegar að ekki megi koma inn á það hér í umræðum um þetta mál að slík skoðanakönnun hafi farið fram og niðurstaðan hafi verið sú að 60% þjóðarinnar eru hlynnt því að lögleiða íþróttina. Mér þykir það ekki verra að aðrir skuli í þessu máli hafa sömu skoðun og meiri hluti nefndarinnar.
Meginrökin í málinu eru auðvitað þau að hver og einn eigi sjálfur að geta ákveðið hvaða íþróttagrein hann stundar. Það er alveg ljóst að það verða alls konar slys í öðrum íþróttagreinum en boxi. Það er alþekkt í íþróttaiðkun að slíkt geti gerst. Við sáum það síðast nú í handknattleiknum að þar þurfti að sauma einn leikmanna meðan á leik stóð.